Соңғы жылдары білім беру саласында жасанды интеллектіні қолдану қарқынды түрде артып келеді, алайда оның мектеп оқушыларының оқу үдерісіне ықпалы туралы эмпирикалық деректер әлі де жеткіліксіз. Зерттеудің мақсаты – мектеп оқушыларының ағылшын тілін үйрену барысында жасанды интеллект құралдарын (ChatGPT және Gemini) қолдануға деген көзқарасын анықтау, сондай-ақ оларды қолдану мақсаттарын, артықшылықтары мен қиындықтарын айқындау. Алматы қаласындағы мектептің 5–11-сыныптарында оқитын 135 оқушы арасында сандық сипаттамалық зерттеу жүргізілді. Деректер Google Forms платформасында әзірленген онлайн сауалнама арқылы жиналды. Деректерді талдау барысында жиілік талдауы, Кронбах альфа коэффициенті, Манн–Уитни U критерийі, Краскел–Уоллис критерийі, Спирмен корреляциясы және хи-квадрат критерийі қолданылды. Нәтижелер оқушылардың 71,6%-ы ағылшын тілін үйрену барысында жасанды интеллектіні қолданатынын көрсетті. Ең көп қолданылатын функциялар: мәтін жазу (42,2%), аударма жасау (37,0%), лексиканы меңгеру (37,0%) және грамматиканы тексеру (34,1%). Жасанды интеллектіге деген көзқарас индексінің орташа мәні M = 4,06 (SD = 0,87) болып, оқушылардың оң көзқарасын көрсетті. Сынып деңгейлері арасында статистикалық тұрғыдан маңызды айырмашылықтар анықталды (H = 24,16, p < 0,001): жоғары сынып оқушылары жасанды интеллектіні жиірек қолданғанымен, оған сыни тұрғыдан көбірек қарайды. Гендерлік айырмашылықтар анықталған жоқ. Негізгі артықшылықтар ретінде уақытты үнемдеу (46,7%) және грамматиканы жақсарту (42,2%) көрсетілді. Негізгі қиындықтар – дәл емес ақпарат алу қаупі (45,9%) және жасанды интеллектке тәуелділік (34,8%). Зерттеу нәтижелері жасанды интеллектіні қабылдаудың екіжақты сипатын көрсетеді: оқушылар оның білім беру әлеуетін мойындай отырып, онымен байланысты тәуекелдерді де түсінеді. Алынған нәтижелер жасанды интеллектіні ағылшын тілін оқыту үдерісіне кіріктірудің педагогикалық стратегияларын әзірлеуге ықпал етуі мүмкін.